Kjeldsund har historie tilbake til 1600-talet, som handelsstad og husmorskule. Sidan 1960-talet har NMS drive staden som gjestegard og leirstad.
Ved den gamle fjordemannsleia ligg Kjeldsund idyllisk til, mellom holmar og skjer, fjord , fjell og skog. Med eiga lun båthavn, der sjøen går heilt inn til tunet. Her har vore handelsstad frå før nokon veit. Her gjekk den tida sin hovedvei med dei mange større og mindre båtane som traffikerte og var så viktige for alle.
Kjeldsund hadde i gammal tid svært mange bygningar. Forutan hovudbygning og bor’stove var det mange typar naust, eldhus, stabbur og bakeri, smie, låve, fjøs og endå meir. Staden utmerkte seg også som gjestgivarstad.
Det heiter i eit skriv frå 1800 at Kjeldsund var «Et meget bekvemt Handel og Giestgiveri-sted». Det var jamnast rett til både skjenking og sal av drikkevarer. I 1853 frarådde kommunestyret i Herøy denne praksisen med den grunngjeving at: «der er noget særeget ved denne vahresort, at jo mere der gives anledning, desto mere vil der blive af samme forbrugt». Men ikkje før århundreskiftet vart det slutt med skjenkinga.
I mange år var det også tingstad på Kjeldsund. I tinget kom skrivar og fut og andre rettsfolk. Desse bodde på staden dei to til tre dagane tinget stod på.
Frå 1804 var Kjeldsund postopneri, det fyrste og einaste i Herøy! Her vart også Herøy og Rovde Sparebank stifta. Det var i 1843. I 1918 vart namnet endra til Herøy og Leikong Sparebank – i dag kjend som Sparebanken Møre.
1926 vart eit katastrofeår i Kjeldsund si historie. I ein storbrann som starta kl.03.30 den 4. oktober, strauk hovudbygninga med, saman med sjøbua, bor’stova og fleire andre hus. I åra som fulgde vart fleire av bygningane reist att, og handelsverksemda heldt fram endå ei del år.
I tida 1948 til 1955 leigde Sunnmøre Husstellskule heile staden her, og dreiv då husmoskule. Handelstradisjonen i Kjeldsund var no ute for godt. I og med at veiane vart fleire og betre, og det vart fleire bilar, ja då minka det på nyttetrafikken på sjøen. Kjeldsund vart då stadig mindre interessant som handelsstad.
Då kom Det Norske Misjonsselskap inn i biletet. Der var det framsynte personar som såg for ein fantastisk leirstad dette kunne vere. Dei fekk kjøpe Kjeldsund av dåverande eigar Helge Hovlid, heilt i byrjinga av 60 talet.
Sidan då har denne naturfagre staden, vore samlingsstad for born, unge og eldre, der bodskapen om Jesus har vore og er det mest sentrale. Kjeldsund er i dag ein av dei mange leirstadane som NMS har i Norge, og berre på Kjeldsund samlast hundrevis av born og unge kvart år.
Staden nyttast ikkje berre til leir, det kan nemnast familieleirar, korsamlingar, international leir, barnehagar, pensjonistsamlingar, Y’s Men og mykje anna. Kjeldsund har vorte svært populær som kurs- og konferansestad, utanfor allfarveg, men likevel med sentrale plassering på Søre Sunnmøre.
Med små og store selskapslokale og eit svært godt kjøkken produserer, er Kjeldsund mykje nytta som stad for jubileum, selskap, familietreff, bryllaup og minnesamver.
Sidan 2015 har Kjeldsund teke i mot enkeltpersonar og familiar som ynskjer overnatting, anten på soverom eller i hytter. På våren og hausten har vi opa servering av potetball på torsdagane og om sommaren inviterer vi til stor familiebuffet på søndagane.
I mars plar det vere basar på Kjeldsund, stor jonsokfeiring i juni – og eiga julemesse i november.
Vi høyrer svært ofte av gjestane våre at «det er så godt å kome til Kjeldsund, vi kjem att». Vi gler oss over å kunne skape gode ramme for arrangørar og gjestar. Velkomen til Kjeldsund!
Gode minne i vente
